2024ko
Memoria

1Euskal Autonomia Erkidegoan talentuaren erronkari buruzko ikuspegi partekatua eraikitzea

Euskadi 2040 ikuspegiak, Orkestrak eta euskal erakundeek elkarlanean eraikiak, talentua erakartzea eta etengabeko ikaskuntza ditu Euskadi oparoa lortzeko funtsezko ardatz.

Proiektu horri lotuta, Eusko Jaurlaritzan prozesu bat bideratu dugu talentuaren eta gaitasunen esparruan estrategia integral bat garatzeko. Bide horretan, dauden ekimenen mapa osatu dugu eta sailen arteko elkarlana sustatu dugu, sinergiak sortzeko.

2Belaunaldien arteko erreleboari eta enpleguaren etorkizunari buruzko elkarrizketa sustatzea

Eusko Jaurlaritzako Ekonomia, Lan eta Enplegu Sailarekin batera, belaunaldien arteko harremanari eta belaunaldi erreleboari buruzko ikuspegi partekatua eraikitzeko lan egin dugu.

Lurralde erakundeekin eta enpresa klusterrekin hainbat topaketa egin ondoren, politika publikoak diseinatzean alderdi horiek integratzeko erronka eta aukera nagusiak identifikatu ditugu.

3Bizkaian STEM talentuaren eskasia arintzeko ekosistema bat sortzea

2022az geroztik, Bizkaiko Foru Aldundiarekin elkarlanean ari gara STEM talentuaren eskasiari erantzun bat emateko ekimen batean. Aurten, Bizkaia with the talent gaitasunen ekosistema diseinatzen eta abian jartzen lagundu dugu. Ekosistema horrek enpresen, unibertsitateen, klusterren eta lanbide heziketako ikastetxeen arteko koordinazioa errazten du.

Gainera, lurraldeko STEM prestakuntza eskaintzaren ezaugarriak zehazteko azterketa bat zuzendu dugu, talentu kualifikatua edukitzeko aukerak identifikatu ahal izateko, prestakuntza merkatuaren beharrekin bat datorrela ziurtatuz.

4Gipuzkoako enpresetan lanaren zentzua hobetzea

Gipuzkoako Foru Aldundiaren Etorkizuna Eraikiz Think Tankaren barruan 2020-2021ean bideratu genuen deliberazio espazioetako batean enpresetan lanaren zentzua indartzeko beharra nabarmendu zen. Mondragon Unibertsitateak gidatutako sei proiektu pilotuko fase esperimental baten ondoren, 2023-2024an ekintza-ikerketako lantegiak garatu ditugu, Ekonomia Sustapeneko Sailarekin batera.

Tailer horietan, eskualdeko hamar garapen agentzietako ordezkariek, Aslek, Gipuzkoako Merkataritza Ganberak eta Tknikak hartu dute parte, eta enpresei lanaren zentzua hobetzen laguntzeko gaitasunak garatu dituzte, erronka garrantzitsuei erantzuteko, horien artean, talentuaren fidelizazioari eta lan absentismoari.

5Hirietan zerbitzu aurreratuetako talentu eskasiari irtenbide bat ematea

Zerbitzu Aurreratuek kualifikazio handiko talentua behar dute, beste enpresa batzuei soluzio espezializatuak ematen dizkietelako. 2024an, sektorearen lehiakortasuna indartzeko bi proiektutan lan egin dugu, Bilbon eta Donostian.

Bilbon, Bilbao Ekintzari lagundu diogu Lanbide Heziketak Zerbitzu Aurreratuetako enpresak langile kualifikatuz hornitzeko duen ahalmena aztertzeko proiektu batean. Proiektu horren ondorioz, Lanbide Heziketarekin lotutako lurraldeko eragileekin ekosistema bat sortu da, Zerbitzu Aurreratuetako talentuaren erronkari elkarlanean erantzun ahal izateko.

Donostia Sustapenarekin batera, Jakintzan Intentsiboak diren Enpresa Zerbitzuetako (KIBS) enpresen jarduna aztertu dugu. Lan horren bidez baieztatu ahal izan dugu talentu espezializatuaren eskasia funtsezko erronka dela hirian sektorearen lehiakortasunerako. Bide horretan, etorkizuneko estrategietarako oinarriak ezarri ditugu.

6Etorkizuneko lanbide berdeak identifikatzea eta jasangarritasunerako funtsezkoak diren sektoreetan Lanbide Heziketak erreleboa nola ziurta dezakeen aztertzea

Ikerketa proiektu honetan, Lanbide Heziketak ingurumenaren jasangarritasunean duen zeregina aztertu dugu, eta ondorioztatu dugu Espainiak, ingurumeneko trantsizio prozesuari aurre egiteko, milioi bat gazte gehiago behar dituela lanbide berdeetan.

Caixabank Dualizarekin argitaratu dugun txostenaren arabera, Euskal Autonomia Erkidegoko datuak itxaropentsuak dira: azken bost urteetan, Lanbide Heziketako ikasleen % 50 jasangarritasunarekin lotutako zikloetan matrikulatu da. Gainera, 2025 eta 2035 bitartean ia 650.000 enplegu aukera sortuko dira Euskal Autonomia Erkidegoan, eta horietatik % 30 enplegu berdeak izango dira.