2026ko martxoaren 17a
Argazkia: Oskar Gonzalez, DEIA
- Bilboko Udalak Orkestrako ikertzailea saritu du "Bilboko Emakume Migratuen Aintzatespenaren" VII. edizioan
- Udal ekimen honen helburua da jatorri migratzailea duten emakumeek hiriko bizitza sozial, ekonomiko eta kulturalari egiten dioten ekarpena balioestea.
- 2022tik aurrera, Mosquera Orkestrako Energia eta Ingurumen Labeko kide da. Bertan, trantsizio energetikoa ingurumen-iraunkortasuna, lehiakortasuna eta ongizatea barne hartzen dituen ikuspegi batetik jorratzen duten lanak garatzen ditu.
Bilboko Udalak Stephanía Mosquera Orkestrako ikertzailea saritu du "Bilboko Emakume Migratzaileen Aintzatespenaren" VII. edizioan. Udal-ekimen hori proiektu estrategikoa da Immigrazioko Tokiko Kontseiluan, eta emakume etorkinak bizitza sozial eta publikoan duen presentziaren garrantzia aitortzea du helburu.
Joan den martxoaren 13an, ostirala, banatu ziren sariak Bilboko udaletxean, Amaia Arregi alkatea buru zela. Beste bost emakume migratzailek ere aintzatespena jaso zuten. Stephanía Mosquera saritu zuten Emakume Zientzialariaren kategorian. Arlo zientifikoan, teknologikoan edo ikerketaren arloan ekarpenen bat egin duten emakumeak saritzen dituzte kategoria horretan.
Ekitaldian azpimarratu zuenez, migratzea "ez da erraza, berriro hastea eta sare berriak eraikitzea baitakar", baina "babesten gaituzten pertsonez eta ateak irekitzen dizkigun hiri batez inguratuta gaudenean, bide hori posible bihurtzen da". Zentzu horretan, eskerrak eman nahi izan zizkien Orkestrako kideei"hemengo parte" sentiarazteagatik, beraiekin partekatzen baitu egunerokotasuna.
Stephania Mosquerari buruz
Jatorriz Calikoa (Kolonbia), Stephanía Mosquerak hamarkada bat baino gehiagoko ibilbide akademikoa eta ikerketa du. Ekonomialaria da, Ekonomia Aplikatuan masterra eta Ingeniaritzan doktoregoa du (Industria Ingeniaritzan Enfasia) Universidad del Vallen lortutakoa. Doktore-tesia merkatu elektrikoetako arrisku finantzarioaren neurketa eta ebaluazioan oinarritu zuen, eta doktore-egonaldia EPFL Unibertsitateko (Suitza) Energy Center-en egin zuen.
- Ikerketa-jarduera: energia-merkatuen analisian oinarritu da haren ikerketa, arreta berezia jarriz elektrizitatearen eta gas naturalaren prezioen modelizazioan, horien lurrunkortasunean eta lotutako arriskuetan. Lan hori zuzenean lotzen da energia-prezioek enpresen lehiakortasunean eta etxeen ongizatean duten eraginarekin, inflazioa edo pobrezia energetikoa bezalako fenomenoei helduz. Era berean, klima-aldaketak elektrizitatearen prezioen dinamikan eta energia-kalteberatasunean duen eragina aztertzen du. Azken urteotan, ikerketa-agenda zabaldu du, besteak beste, lehengai kritikoetara, energiaren geopolitikara eta lurralde-lehiakortasunera. Bere lanak Energy Economics edo Energy Policy bezalako eragin handiko nazioarteko aldizkarietan argitaratu dira.
- Irakaskuntza: Mosquera irakasle izan da Kataluniako Oberta Unibertsitatean, EAFIT Unibertsitatean eta Universidad del Vallen, eta finantzen, finantza-arriskuaren, matematika finantzarioen eta makroekonomiaren inguruko irakasgaiak eman ditu.
2022ko azaroaz geroztik, Orkestrako Energia eta Ingurumeneko Laborategiko ikertzailea da. Lehiakortasunerako Euskal Institutuan, energia-merkatuetan eta EAEko lehiakortasunerako eta ongizaterako funtsezko ildo berrietan (hala nola sare elektrikoen zereginean edo trantsizio jasangarrirako beharrezkoak diren tokiko energia berriztagarriko proiektuen gizarte-onarpenean) ikertzen jarraitzen du.
Era berean, Deustuko Unibertsitatearen etorkizun jasangarri baterako berrikuntza, ekintzailetza eta finantzei buruzko ikerketa-taldeko kide da, eta irakasle-bideratzaile gisa laguntzen du Berrikuntza eta Teknologiako Etengabeko Prestakuntzako Masterrean (MDIT), Trantsizio Jasangarriko eta Deskarbonizazioko moduluan.
Bere lanak trantsizio energetikoa jorratzen du, ingurumen-jasangarritasuna, lehiakortasuna eta ongizatea barne hartzen dituen ikuspegi batetik. Esparru horretan, energia-sistemako aldaketek etxeen kalteberatasunean nola eragiten duten aztertzen du, eta herritarren parte-hartzea txertatzen duten eta kolektibo ahulenei arreta ematen dieten politikak diseinatzearen garrantzia azpimarratzen du.
Gainera, genero-ikuspegia zeharka txertatzen du pobrezia energetikoa edo energia berriztagarrien proiektuetan parte hartzea bezalako fenomenoen azterketan, trantsizio energetiko bidezkoago eta inklusiboago baterantz aurrera egiten lagunduz.
