Azkar iritsi nahi baduzu, bakarrik abiatu zaitez, urrun iritsi nahi baduzu, lagundurik joan

De Geusek sortutako "living company" terminoak paradigma-aldaketa bat eragin du enpresen ikuskeran, eta epe luzera irauteko eta hazteko potentziala duten erakunde biziduntzat hartu ditu. Enpresa-taldeek enpresen bilakaera islatzen dute, erakunde biziak diren aldetik, eta berebiziko garrantzia dute enpresa-sarea indartzeko, lankidetza sustatuz eta hazkunde ekonomikoa sustatuz.

Lankidetza-adibide praktikoak erakusteko, Baskeep Konnekt jardunaldia egin zen, SPRIk antolatuta. Programa honek hainbat finantza-behar dituzten enpresak inbertitzaileekin lotzen ditu, eta gai kritikoak jorratzen ditu, hala nola familia-enpresen ondorengotza edo enpresa-taldeen sorrera. Hizlari batek bere esperientzia laburbildu zuen esaldi honekin: "Azkar iritsi nahi baduzu, bakarrik abiatu zaitez, urrun iritsi nahi baduzu, lagundurik joan"

Familia-enpresetako ondorengotza erronka handia da gure ekonomiarentzat; izan ere, aztertutako enpresen % 66k banako bat edo familia bat dute akziodun nagusi. Datu hori Enpresa taldeak Euskal Autonomia Erkidegoan txostenetik dator. Txosten hori Orkestrak eta Deusto Business Schoolek elkarlanean egin dute, Finantzen Euskal Institutuaren laguntzarekin. Txostenak Euskadiren ikuspegi integrala eskaintzen du, lurraldean dauden 4.136 enpresa-taldeen azterketaren bidez. Horietatik, 2.802 euskal taldeak dira, 10.253 eskumendekoekin, gutxi gorabehera % 54 EAEn, % 20 Espainiako beste eskualde batzuetan eta % 26 atzerrian.

ARGITALPENA

Enpresa taldeak Euskal Autonomia Erkidegoan

Txosten honek Euskadiko enpresen akziodunen egitura deskribatzen du, enpresa-taldeen garrantzia erakutsiz. Era berean, Euskadin dauden enpresa-talde horiek identifikatzeko eta sailkatzeko metodologia bat proposatzen du.

+ Deskargatu argitalpena

Lanaren arabera, enpresa-taldeak gure ekonomiaren irekitasunaren adierazle argiak dira. Badirudi haien garapenak nazioartekotze-estrategiak bultzatzen dituela, bai esportazio-jardueraren bidez (taldeetan afiliatutako enpresen % 31,6k esportatzen dute, enpresa independenteen % 12,2rekin alderatuta), bai atzerrian eskumendekoak sortuz. Euskal enpresa taldeek 2.623 eskumendeko dituzte garu egun atzerrian, eta presentzia nabarmena dute Estatu Batuetan, Mexikon eta Brasilen. Azken hamarkadan hiru herrialde horiek ordezkatu dituzte Erresuma Batua, Frantzia eta Portugal, euskal taldeentzat nazioarteko helmuga garrantzitsuenak diren aldetik. Bilakaera horrek erakusten du euskal taldeek gero eta interes handiagoa dutela kontinente amerikarrean inbertitzeko, Europako merkatuarekin alderatuta.

Mapa: Euskal taldeetako atzerriko filialen banaketa geografikoa

Iturria: Guk geuk egina, SABIren datuekin (2022). 

Gure ekonomia ireki izanaren beste adierazle bat da Euskaditik kanpoko 1.334 enpresa-taldek parte hartu dutela euskal enpresetan. Euskadiko enpresa-taldeen % 32 dira, eta 2.527 enpresatan hartzen dute parte. Hurrengo taulan ikus daitekeenez, enpleguari dagokionez, Euskadiko filialak dituzten atzerriko hogei talde handienen artean, energia-, industria-, merkataritza- eta garraio-sektoreak nabarmentzen dira.

Taula: Atzerriko 20 talde handienak, enpleguaren arabera

Enpresa-taldeek euskal ekonomian duten garrantzia dela eta, komenigarria da haiekin batera doazen finantzaketa-mekanismoak indartzen jarraitzea, errotzea sustatzeko, lehiakortasuna bultzatzeko eta Euskadin garapen ekonomikoa sustatzeko. Hori lortzeko ekimen batzuk Finantza eta Inbertsio Klusterra eta Finkatuz inbertsio-funtsa dira. Lehenengoaren helburua da finantza-enpresen eta inbertitzaileen lehiakortasuna, presentzia eta aniztasuna indartzea lurraldean, enpresa-sarearen premiekin bat etorriz. Finkatuz funtsak 300 milioi euro ditu, eta euskal enpresa handiak errotzea du helburu.

Bidelagun onenak aukeratzeko aukera izateak enpresa-proiektuen bizi-prozesua oparoagoa eta luzeagoa izatea eragiten du, hazkunde iraunkorra eta finkatua izan dezaten, eta horrek Euskadiren garapena eta ongizatea ekarriko du.

• (1) Enplegua Euskadin helbideratuta dauden taldeko enpresetan.
• (2) 2022ko irailean, ITP Aero, ROLLS -ROYCE HOLDINGS PLCren Euskadiko eskumendeko nagusia, Bain Capital Private Equity funts estatubatuarrak erosi zuen gehiengoaren partaidetzarekin.