2026ko urtarrilaren 26a
- Energiaren alorreko 60 profesional baino gehiago bildu dira Deustuko Unibertsitatean, erregai berriztagarrien erregulazio-erronkei buruzko eztabaida-foro batean parte hartzeko.
- Jardunaldian, besteak beste, Espainiako gobernuko Trantsizio Ekologikoaren eta Erronka Demografikoaren Ministerioko, Europako Batzordeko eta Europako Parlamentuko ordezkariek parte hartu dute.
- Energiaren inguruko gai garrantzitsuei eta gaur-gaurkoei heltzeko 2026an antolatuko diren hiru foroetako lehena izan da.
Orkestra lankidetzan aritu da Petronorrekin eta Energy Intelligence Centerrekin (EIC), erregai berriztagarrien garapenari lotutako erronka nagusietako batzuk aztertzera bideratutako eztabaida-foro berriak abian jartzeko.
Lehen foroak 60 profesional baino gehiago bildu ditu Deustuko Unibertsitateko Bilboko campusean, eta erregai berriztagarrien erregulazio-testuingurua izan du ardatz. Zehazki, erregai horien garapena baldintzatzen duten pizgarriak eta oztopoak jorratu dira, bai Europan, bai estatuan.
Emiliano López Atxurra Petronorreko presidenteak eman dio hasiera saioari, eta azpimarratu du garrantzitsua dela erakundeen, enpresa-sektorearen eta esparru akademikoaren artean hausnarketa partekaturako guneak sortzea, ekonomiaren deskarbonizazioan aurrera egiteko, lehiakortasunaren eta hornidura-segurtasunaren erronkak ahaztu gabe.
Ondoren, Yolanda García Mezquita Europako Batzordeko Energiaren Zuzendaritza Nagusiko unitateko arduradunaren hitzaldia izan da, Bruselatik. Garcíak energia-horniduraren segurtasunaren Europako testuingurua aurkeztu du, baita Energia Berriztagarrien Zuzentaraua (RED III) ezartzearen eta energia-trantsizioan erregai berriztagarriek duten paperaren inguruan abian diren eztabaida nagusien ikuspegia ere.
Hitzaldia amaituta, Europako erregai berriztagarrien erregulazioa aztertzeko saio bat egin da. Bertan, David Robinsonek, Oxford Institute for Energy Studieseko Senior Research Fellowk, eta Iñigo del Guayok, Energia Zuzenbidearen Espainiako Elkarteko (AEDEN) presidenteak, parte hartu dute. Biek ala biek ikuspegi juridiko eta ekonomikoa eman dute dauden pizgarriei buruz eta teknologia horien hedapenari eragiten dieten erregulazioen mugei buruz. Mónica de la Cruz CRECEMOSeko zuzendari nagusiak moderatu du eztabaida.
Europako energia-erregulazioari eta erregai berriztagarriei buruzko ikuspegi politikoak kontrastatzeko, europarlamentarien mahai-inguru bat izan da jardunaldian. Bertan parte hartu dute Javier Zarzalejosek (Europako Alderdi Popularra), Nicolás González Casaresek (Sozialisten eta Demokraten Taldea) eta Oihane Agirregoitiak (Renew Europe – EAJ). Joseba García Garaigordobil Energy Intelligence Center-eko zuzendari nagusiak moderatu du eztabaida.
Foroaren bigarren saioan, erregai berriztagarriak sustatzeko eta garraioaren deskarbonizazioa bultzatzeko Errege Dekretuaren proiektuak aztertu dira, eta erregulazio-tresna horiek benetan sektorearen garapenari laguntzeko beharrezkoak diren baldintzei heldu zaie. Saio honetan Berta Cabellok, Repsoleko Erregai Berriztagarrien zuzendariak, eta Oliverio Alvarezek, Deloitteko Energia, Baliabide eta Industriako bazkide arduradunak parte hartu dute, Aitor Arzuaga Alba Emission Free Energyko kontseilari ordezkariak moderatuta.
Jardunaldia amaitzeko, Ivan Marten Orkestrako presidenteak foroaren mezu eta ondorio nagusiak laburbildu ditu. José Luis Cabo Sánchez Trantsizio Ekologikorako eta Erronka Demografikorako Ministerioko Hidrokarburoen eta Erregai Berrien zuzendariorde nagusiak eman dio amaiera instituzionala topaketari.
Erregai berriztagarriak, deskarbonizazioan aurrera egiteko beharrezko tresna
Jardunaldian zehar egindako ekarpenetatik abiatuta, Orkestrak laburpen-dokumentu bat egin du, foroaren ondorio nagusiak eta parte-hartzaileek partekatu dituzten mezu nagusiak biltzen dituena, erregai berriztagarrien garapenari buruzko eztabaida publiko eta arautzailean laguntzeko helburuarekin. Ondorio nagusien artean, hauek nabarmentzen dira:
- Erregai berriztagarriek funtsezko zeregina dute nekez elektrifika daitezkeen sektoreak deskarbonizatzeko, hala nola garraio astuna, airekoa edo itsasokoa, eta energian intentsiboak diren industria jakin batzuk.
- Eskaera-seinaleak eskainiko dituen eta inbertsioa sustatuko duen epe luzeko arau-esparru argia, egonkorra eta erregulatzailea edukitzeko beharra, neutraltasun teknologikoa, horniduraren segurtasuna eta autonomia estrategikoa bezalako printzipioetan oinarritua.
- Espainiak Europan erregai berriztagarrien garapenean erreferente bihurtzeko potentziala du, lerrokatutako erregulazio-esparru batekin (RED III energia berriztagarriei buruzko zuzentaraua eta deskarbonizazioa bultzatzeko eta erregai berriztagarriak sustatzeko Errege Dekretua)
Topaketa hau ekonomiaren deskarbonizazioaren eta erregai berriztagarrien rolaren inguruko gaurkotasuneko gai garrantzitsuak diziplina askotako ikuspegitik lantzeko 2026an egingo diren hiru foroetako lehena izan da. Topaketa horien helburua da energia-trantsizioari lotutako araugintzako, ekonomiako eta lurraldeko erronka nagusiei buruzko eztabaidarako analisi zorrotzak egitea.
